Azərbaycanda sahibkarlıq

Məcmuə mikro, kiçik və orta sahibkarlıq subyektlərinin fəaliyyətini əks etdirməklə, hüquqi şəxslərlə yanaşı, mikro sahibkarlıq subyekti hesab olunan fərdi sahibkarlar – fiziki şəxslər üzrə də kompleks məlumatları əhatə edir və Avropa İttifaqının (Aİ) “Biznes statistikası sahəsində məlumatların toplanması, işlənilməsi, təhlili, nəşri və yayımlanması işlərini gücləndirmək məqsədilə Dövlət Statistika Komitəsinə və İqtisadiyyat Nazirliyi yanında Dövlət Vergi Xidmətinə dəstək” Tvinninq layihəsi çərçivəsində beynəlxalq ekspertlər tərəfindən verilmiş tövsiyələr nəzərə alınmaqla hazırlanmışdır. Məcmuədə mikro, kiçik və orta sahibkarlıq subyektlərinin əsas makroiqtisadi göstəriciləri, onların ölkə iqtisadiyyatında payı, yeni yaradılmış və ləğv edilmiş sahibkarlıq subyektlərinin sayı, investisiya qoyuluşları, xərcləri, sahibkarlıq subyektlərində çalışan muzdlu işçilərin sayı, əməkhaqları və digərlərinə dair məlumatlar əks olunur.

Məlumatlardan rahat istifadəni, regionlar üzrə müqayisələrin aparılmasını asanlaşdırmaq üçün informasiyalar qruplaşdırılmışdır. Ayrı-ayrı göstəricilər fəaliyyət və mülkiyyət növləri, iqtisadi rayonlar üzrə verilmişdir.

Qeyd: Mikro, kiçik və orta sahibkarlıq subyektləri Azərbaycan Respublikası Nazirlər Kabinetinin 2018-ci il 21 dekabr tarixli 556 nömrəli qərarı ilə təsdiq edilmiş mikro, kiçik, orta və iri sahibkar meyarlarına uyğun olaraq müəyyən edilmişdir. Mikro sahibkarlara işçilərinin orta siyahı sayı 10 nəfərədək, illik gəliri 200 min manatadək olan, kiçik sahibkarlara işçilərinin orta siyahı sayı 11 nəfərdən 50 nəfərədək, illik gəliri 200 min manatdan 3000 min manatadək olan, orta sahibkarlara işçilərinin orta siyahı sayı 51 nəfərdən 250 nəfərədək, illik gəliri 3000 min manatdan 30000 min manatadək olan müəssisələr aid edilirlər.

Məcmuə iqtisadçılar, tələbələr, elmi işçilər və digər istifadəçilər üçün nəzərdə tutulmuşdur. Nəşrlərdə və çap işlərində statistik məlumatdan istifadə edərkən Azərbaycan Respublikasının Dövlət Statistika Komitəsinə istinad edilməlidir.

Xüsusi işarәlәr:
“-” hadisə baş verməmişdir
“...” məlumat mövcud deyil və ya konfidensial xarakter daşıyır
“0,0” məlumat çox kiçik rəqəmlə xarakterizə olunur
“x” müqayisə mümkün deyil

İzahlar:
“Rəsmi statistika haqqında” Azərbaycan Respublikası Qanununun 22-ci maddəsində yekun statistik məlumatların yayılması üçün müəyyən edilmiş qaydalara uyğun olaraq 18, 21, 22 və 23 nömrəli cədvəllərdə bir sıra rayonlar üzrə məlumatlar göstərilməmişdir. Lakin bu məlumatlar ölkə, müvafiq iqtisadi rayon və rayonlar (şəhərlər) üzrə yekunlara daxil edilmişdir.
Bəzi hallarda yekunla toplananların cəmi arasındakı fərq rəqəmlərin yuvarlaqlaşdırılması ilə izah olunur.
Cari ilə dair məlumatlar növbəti dəqiqləşdirilmiş statistik hesabatlar əsasında sonrakı nəşrlərdə korrektə edilə bilər.
Bu nəşrdə dərc edilmiş məlumatlar növbəti nəşrlərdə məlumat mənbələrində baş verən dəyişikliklərə uyğun olaraq dəqiqləşdirilə bilər.
Sahibkarlıq fəaliyyəti ilə məşğul olan fiziki şəxslər üzrə məlumatlar mikro sahibkarlıq subyektlərinə dair məlumatlara daxil edilmişdir.