Noyabrın 16-da Dövlət Statistika Komitəsinin sədri cənab Tahir Budaqov Koreya Statistika Komitəsinin (KOSTAT) nümayəndələri ilə görüşüb.

Görüşdə Azərbaycan Respublikası Prezidentinin 2020-ci il 11 fevral tarixli Fərmanı ilə təsdiq edilmiş “Azərbaycan Respublikasının Dövlət Statistika Komitəsi ilə Koreya Statistika Komitəsi arasında statistika sahəsində əməkdaşlıq haqqında Anlaşma Memorandumu”ndan irəli gələn məsələlər, o cümlədən Koreya Statistika Komitəsi ilə birgə həyata keçirilən növbəti “İnteqrasiya olunmuş inzibati məlumat bazalarının idarə olunması sisteminin yaradılması” layihəsi çərçivəsində 2022-ci ildə görülən işlər haqqında danışılmış, “İnzibati Məlumatların İdarə Olunması Sistemi – ADİS” informasiya sisteminin hazırlanaraq istifadəyə verilməsinin mühüm əhəmiyyəti vurğulanmış, gələcəkdə iki tərəf arasında əməkdaşlıq perspektivləri müzakirə olunmuşdur.

Rəsmi statistika sahəsində son illər Azərbaycanda həyata keçirilən islahatlar barədə məlumat verən Komitə sədri Tahir Budaqov qeyd edib ki, statistik məlumatların istehsalı prosesində müasir informasiya və kommunikasiya texnologiyalarının tətbiqində daha üstün təcrübəyə malik Koreya Statistika Komitəsi ilə əməkdaşlıq Dövlət Statistika Komitəsi üçün yeni imkanlar yaratmışdır. Eyni zamanda KOSTAT-ın Planlaşdırma və əlaqələndirmə üzrə baş direktoru cənab Hyangwoo Jeong Dövlət Statistika Komitəsi ilə KOSTAT arasında 2018-ci ildən qurulmuş ikitərəfli əməkdaşlığın uğurlu inkişafından, ötən dövrdə həyata keçirilmiş layihələrin vaxtında və keyfiyyətlə icra olunmasından məmnunluğunu ifadə etmiş, yeni layihə təklifləri haqqında fikirlərini bildirmişdir.

Sonda qarşılıqlı maraq doğuran məsələlər ətrafında fikir mübadiləsi aparılıb.