2008-ci ilin yanvar-sentyabr aylarında Azərbaycan Respublikası 135 ölkə ilə ticarət sahəsində qarşılıqlı surətdə faydalı əməkdaşlıq edərək 44.2 milyard ABŞ dolları məbləğində idxal-ixrac əməliyyatları aparmışdır. Xarici ticarət dövriyyəsinin 39.0 milyard dollarını (88.2 faizini) ölkədən ixrac olunmuş mallar, 5.2 milyard dollarını (11.8 faizini) ölkəmizə idxal edilmiş məhsullar təşkil etmiş, 33.8 milyard dollarlıq müsbət saldo yaranmışdır. Keçən ilin yanvar-sentyabr ayları ilə müqayisədə xarici ticarət dövriyyəsinin həcmi 5.4 dəfə, o cümlədən ixrac 9.0 dəfə, idxal 33.8 faiz artmışdır. İxrac-idxal əməliyyatlarının 53.0 faizi Avropa Birliyi, 6.8 faizi MDB ölkələri ilə, 40.2 faizi isə digər dövlətlərlə aparılmışdır. Ümumi dövriyyənin 59.1 faizi Avropa, 25.1 faizi Asiya, 15.3 faizi Amerika, 0.5 faizi Afrika qitəsi ölkələrinin, 0.03 faizi isə Okeaniyanın payına düşmüşdür. Xarici ticarət əməliyyatlarının beşdə dörd hissəsindən çoxu (81.3 faizi) İtaliya, Amerika Birləşmiş Ştatları, İsrail, Hindistan, Fransa, Rusiya, İspaniya, Niderland, Birləşmiş Krallıq, Türkiyə, İndoneziya və Çili dövlətləri ilə aparılmışdır.